Менавіта на Полаччыне захавалася адна з традыцый сямейна-родавага абраду «Радзіны» (Хрэсьбіны)—«Мыццё барод».
На большасці тэрыторыі Беларусі пры правядзенні хрэсьбіннага абеду, які арганізоўвалі бацькі пасля хрышчэння дзіця, цэнтрам увагі быў і застаецца абрад падзелу «бабінай кашы». На Полаччыне рытуальныя дзеі хрэсьбіннага застолля гэтым не абмяжоўваюцца. Не менш важным быў звычай «мыць бароды» гасцям, як адзін з усходнеславянскіх звычаяў рытуальнага ачышчэння, прызначаны станоўча паўплываць на здароўе і дабрабыт нованароджанага дзіцяці і ўсіх прысутных. Звесткі аб гэтай традыцыі зафіксаваны ў культуры беларусаў з ХІХ стагоддзя.
У снежні 2024 года элементу нематэрыяльнай культурнай спадчыны «Абрадавая дзея «Мыццё барод» сямейна-родавага абраду «Радзіны» (Хрэсьбіны) населеных пунктаў Полацкага раёна Віцебскай вобласці» нададзены статус гісторыка-культурнай каштоўнасці Рэспублікі Беларусь.
У сучасны перыяд абрадавая дзея захоўваецца і папулярызуецца народным фальклорным ансамблем «Блізнянка» Сільніцкага СДК (кір. Вольга Чобат). Адноўлена па ўспамінах жыхароў вёсак Вароніцкага, Ветрынскага, Бабыніцкага, Астроўшчынскага сельскіх саветаў.
Дзякуем народнаму фальклорнаму ансамблю за цёплыя, беражлівыя адносіны да нашай рэгіянальнай традыцыйнай культуры і жадаем поспехаў у далейшай працы па яе захаванні і адраджэнні!
Ірына КРЫВАНОС, загадчык аддзела народнай творчасці Полацкага РЦК.
