З уборкі азімага ячменю пачалося сёлетняе жніво ў Полацкім раёне. На мінулым тыдні на палі выехалі першыя камбайны. Поўныя каласы хіляцца долу. Гэта культура прадэманстравала высокую ўраджайнасць у гаспадарках «Кушлікі» (37 ц/га), «Новыя Гараны» (28 ц/га) і «Полацк-Мілк» (27,9 ц/га).
![](https://www.pvestnik.by/wp-content/uploads/2024/07/IMG_0660-kopiya.jpg)
Мы напаткалі за шчырай працай у полі ва ўрочышчы Трэпшчына хлебаробаў Мікалая Котава і Андрэя Дыдко з сельгаспрадпрыемства «Полацк-Мілк». Сонца было высока, побач з камбайнамі хадзіў адзінокі бусел. Гэтыя птушкі заўсёды суправаджаюць камбайны, якія ў прамым сэнсе іх кормяць. Добра бачныя пасля жаткі жабы, зайчаняты ці змеі — самая ежа для буслоў.
Мікалай Котаў аказаўся гаваркім. У гэтай гаспадарцы ён працуе 10 гадоў, а ўвогуле на зямлі — цэлых 35! Яго малая радзіма — Шаркаўшчына. На пытанне, чаму з трактара часова перасеў на камбайн, адказаў: «Уборачная — мая стыхія!» Мікалай Міхайлавіч прывык да працы з ранку да вечара, яму даспадобы быць запатрабаваным. Дома з павагай ставяцца да яго прафесіі. Расказаў, што ў яго дружная сям’я, ёсць трое ўнукаў.
Вадзіцель Канстанцін Яшын працуе заўзята, заўсёды ў перадавіках. Не раз яго фота ўпрыгожвала старонкі нашай газеты. На працу ў Начу мужчына ўжо 10 гадоў прыязджае з суседняга Глыбоцкага раёна, з Ломашаў. Працаўнік падзяліўся навіной з асабістага жыцця: сёлета яго дачка Эвеліна скончыла 9 класаў, атрымала пасведчанне з адзнакай.
Працу ў полі пракаментавала галоўны аграном гаспадаркі Таццяна Юндзіль: «Гэта поле плошчай 70 га. А ўсяго пад ячмень сёлета аддалі 194 га. На вытворчым участку «Рудня» 98 га, астатняе — тут. Пасля ячменю будзем убіраць рапс: азімы займае 150 га, 57 га — яравы. Потым чарга зерневых і зернебабовых».
![](https://www.pvestnik.by/wp-content/uploads/2024/07/IMG_0717-kopiya.jpg)
і намеснік начальніка ўпраўлення райсельгасхарчу Наталля Крывец.
Кіраўніка гаспадаркі мы сустрэлі на сушылцы, дзе ўзвышалася гара з ячменю. «Зерне хоць і шчуплае, але ж вырасла, і салома неблагая, сёлетні год лепшы за мінулы, калі была засуха», — зрабіў выснову Вадзім Аляксандравіч.
Для Таццяны Мікалаеўны сёлетняя ўборачная на пасадзе галоўнага агранома шостая. А ў гаспадарцы жанчына працуе 10 гадоў.
— У нас склаўся дружны калектыў, гэта адчуваецца па стаўленню да працы ўсіх людзей. Наш дырэктар Вадзім Лях за нядоўгі час займеў аўтарытэт, — расказала спецыяліст.
За ходам уборкі назіралі працаўнікі Полацкага гаррайаддзела па надзвычайных сітуацыях. Дзяжурства на палях пажарнай машыны патрабуюць правілы бяспекі.
Мы на свае вочы пабачылі першае зерне 2024 года. Канешне, яго трэба пачысціць і высушыць. Але ж галоўнае, што ўраджай ёсць!