Сёлета 17 красавіка «Полацкаму весніку» спаўняецца сто пяць гадоў. За гэты час газета больш за дзесяць разоў мяняла сваю назву. Ва ўсе часы ў ёй працавалі і ёю кіравалі людзі, адданыя друкаванаму слову.
За 105 гадоў «Полацкі веснік» стаў сапраўднай візітоўкай рэгіёна, нашу газету любяць і чакаюць, у яе ёсць верныя сябры і надзейныя партнёры. Але перш чым стаць тым «Полацкім веснікам», які мы сёння дастаем з паштовай скрыні ці набываем у кіёску, газета прайшла доўгі і цярністы шлях.
Для многіх газета стала часткай жыцця, камусьці дала пуцёўку ў вялікую літаратуру ці журналістыку, а для пастаянных чытачоў яна заўсёды была і застаецца нечым большым, чым некалькі друкаваных аркушаў паперы. Калектыў «Полацкага весніка» ведае: ад яго чакаюць самых свежых, самых яскравых навін! Нярэдка здараецца так, што газета становіцца адзіным памочнікам, які змог вырашыць, здавалася б, невырашальную праблему.
Людзям у імклівым ХХІ стагоддзі цяжка ўявіць сабе тыя праблемы, з якімі сутыкаліся горад і раён у 1960-я, 1940-я ці 1920-я гады мінулага стагоддзя. Але, гартаючы газетныя старонкі, мы можам даведацца шмат цікавага і карыснага з гісторыі Полаччыны. Пра тое, як яна жыла ў першыя гады Савецкай улады, як аднаўлялася пасля чарговай вайны, якімі падзеямі было напоўнена гарадское і сельскае жыццё ў эпоху перабудовы і стварэння незалежнай Беларусі, — пра гэта і многае іншае мы раскажам у серыі матэрыялаў пад назвай «Па старонках гісторыі», якая пазнаёміць сучаснага чытача з тым, калі, як і пра што пісала полацкая газета больш за стагоддзе свайго існавання. А яшчэ — з людзьмі, якія ў пэўны час узначальвалі творчы калектыў або ў жыцці якіх газета адыграла значную ролю.
