На мінулым тыдні ў Полацку адбылася рабочая нарада, прысвечаная падрыхтоўцы да святкавання Дня беларускага пісьменства, якую правёў начальнік Галоўнага ўпраўлення ідэалагічнай работы, культуры і па справах моладзі Віцебскага абласнога выканаўчага камітэта Генадзь Ягораў.
Удзел у размове па вырашэнні шэрагу арганізацыйных пытанняў прынялі прадстаўнікі Міністэрства інфармацыі Беларусі, Віцебскага аблвыканкама і Полацкага райвыканкама, сябры Грамадскага аб’яднання «Саюз пісьменнікаў Беларусі», іншыя зацікаўленыя асобы.
У ходзе нарады былі абмеркаваны самыя розныя накірункі падрыхтоўчай работы — ад святочнага афармлення Полацка да зместу праграмы, у якую ўваходзяць дзясяткі разнастайных падзей і праектаў.
Начальнік упраўлення выдавецкай дзейнасці і гандлю Міністэрства інфармацыі Рэспублікі Беларусь Алена Паўлава звярнула ўвагу прысутных на пытанні арганізацыі работы прэс-цэнтра падчас святочных мерапрыемстваў, асвятленне падрыхтоўкі да Дня беларускага пісьменства ў сродках масавай інфармацыі. У ходзе нарады былі разгледжаны пытанні правядзення фіналу рэспубліканскага творчага конкурсу юных чытальнікаў «Жывая класіка», прысвечанага 500-годдзю беларускага кнігадрукавання. Цікавым абяцае быць фестываль кнігі і прэсы.
